Flutt til Keflavíkur

Gleðilegt nýtt ár


Nú erum við búin að setja inn nýjar myndir bæði frá jólapartýi sem við fórum í þann 14. desember og líka frá gamlárskvöldi. Við höfðum það fínt um áramótin, elduðum góðan mat og ræddum framtíðina. Við röltum svo út eftir miðnætti en snérum fljótlega aftur heim því að það var ekki sála á ferli og ekki svo mikið sem einu blysi skotið á loft. Japanir eyða áramótunum í faðmi fjölskyldunnar og á miðnætti heimsækja þeir næsta hof og biðja fyrir nýju ári.
Það stoppaði ekki hjá okkur síminn á nýjársdag. Mamma og pabbi hringdu frá Kanada, en þá var voru 30 mínútur í áramótin hjá þeim og svo hringdu tengdamanna og tengdapabbi, en þá var klukkan hjá þeim um 3 á nýjársnótt. Báðar ömmur mínar voru líka búnar að hringja á milli jóla og nýjárs. Það var mjög gaman að heyra í öllum, takk fyrir að hringja.

Umfjöllun um dvöl okkar í Japan
Í nóvember síðastliðinn kom út skólablað útskriftarnema við Viðskiptaháskólann á Bifröst. Í blaðinu birtist stutt grein eftir okkur um dvöl okkar hér í Japan. Blaðinu var dreift víða og meðal annars fengu forsvarsmenn Verkmenntaskólans á Akureyri eintak og höfðu í framhaldi af því samband við ritstjóra blaðsins, Gunnar Axel Axelsson og vildu fá að birta greinina eftir okkur á heimasíðu Verkmenntaskólans. Okkur finnst virkilega gaman að fá greinina birta á heimsíðu framhaldsskólans okkar sem við erum stolt af. Fyrir þá sem vilja lesa greinina er hana að finna á www.vma.is
Þann 21.desember voru um 50 nemendur brautskráðir frá Verkmenntaskólanum á Akureyri. Við það tækifæri hélt Hjalti Jón Sveinsson skólameistari ræðu og ræddi meðal annars um hversu verðmæt tungumálakunnátta gæti verið og hvað það að sérhæfa sig í einhverju framandi tungumáli gæti veitt manni spennandi tækifæri þegar komið er út á vinnumarkaðinn. Í ræðu sinni vitnaði Hjalti til greinar okkar sem birtist á heimasíðu skólans: “Á heimaíðu skólans getur nú að líta frétt af tveimur nemendum okkar sem eru að freista gæfunnar í Japan um þessar mundir. Við erum stolt af þeim nemendum sem útskrifast héðan eftir mislanga veru í skólanum og það er ánægjulegt að fá að fylgjast með ferðum þeirra á vinnumarkaðinum eða í framhaldsnámi eftir að þeir hafa yfirgefið uppeldisstöðvarnar hér í Eyrarlandsholtinu.”
Ræðuna hans Hjalta skólameistara í heild sinni má finna undir slóðinni: www.vma.is/frettir/Haustonn-02/12-21-utskrift.html

Jólin búin og áramótin á næsta leiti í Japan

Þá erum við komin heim úr snjóbrettaferðinni. Við höfðum það mjög gott, renndum okkur frá 10 á morgnanna til 5 á daginn og slöppuðum svo af í Onseninu á hótelinu á eftir. Það er ekki hægt að segja annað en að það hafi verið mjög vel um okkur á hótelinu, fín aðstaða og góð þjónusta. Nú bíðum við bara eftir að þetta ár kveðji. Klukkan 12 á gamlárskvöld heimsækja Japanir hof og fara með bænir. Það er ekkert verið að sprengja upp gamla árið og fagna því nýja með því að fara út að skemmta sér eins og við erum vön. Ætli við hjónin verðum ekki bara heima í rólegheitum. Við ætlum að hafa heilsteiktar rækjur í forrétt og svínakjöt í aðalrétt. Við erum stöðugt að gera tilraunir í eldhúsinu.
Það eru komnar inn nýjar myndir frá ferðinni á síðuna, þær eru undir myndalinknum MYNDIR 3.

Við segjum þá bara gleðilegt nýtt ár og sjáumst hress og kát á nýju ári